O XXII Certame Literario Concello de Ames premia o talento dos autores en galego

O Certame Literario Concello de Ames celebrou este sábado a entrega de premios da súa vixésimo segunda edición cunha gala literario-musical na Casa da Cultura do Milladoiro que reafirmou, un ano máis, a súa posición como un concurso de referencia para os creadores en lingua galega. Con 158 obras presentadas nesta edición, o evento contou coa presenza de 13 dos 18 autores premiados nas modalidades de narrativa e poesía.

O acto estivo conducido pola xornalista de Ames Radio Belén Martínez e acompañado musicalmente polo alumnado da Escola Municipal de Música de Ames.

Durante a entrega de premios, o alcalde e concelleiro de Normalización Lingüística, Blas García, subliñou a importancia deste certame como plataforma de visibilización do talento literario: "O certame literario de Ames é proba de que cando algo funciona é mellor non tocalo moito. Este certame literario leva descubrindo talento e premiando a xente xa consgrada dende fai 22 anos e oxalá poidamos seguir vendo a novos talentos dentro de outros 22".

Desde a súa primeira edición, o Certame Literario Concello de Ames leva recoñecias 396 obras dun total de máis de 3.000 presentadas. Este ano, as 158 obras recibidas proceden de distintos puntos de Galicia e mesmo doutros lugares do Estado.

18 premiados de 11 concellos

Nesta ocasión, os traballos gañadores proceden dun total de once concellos diferentes como son: Ames, Touro, Oroso, Porto do Son, Santiago, Vigo, A Coruña, Nigrán, Bueu, Allariz e Lugo. No concello amesán quedan cinco destes galardóns: o primeiro premio da primeira categoría na modalidade de narrativa, todos os premios da segunda categoría da modalidade de narrativa e o terceiro premio da segunda categoría na modalidade de poesía.

Na modalidade de narrativa as nove persoas premiadas foron: Iria Martínez Mosquera, Adriana González Leira e Ana López Canosa, na primeira categoría; Elvia Pérez Álvarez, Roi Álvarez Castro e Sarah Muñoz Costa, na segunda categoría; e Alberte Momán Noval, Clara do Roxo e Francisco Javier Fernández Davila, na terceira categoría.

Por outro lado, na modalidade de poesía, os galardoados foron: Arwen Fernández García, Maré Candales González e Luís Moreno Comesaña, na primeira categoría; María Rodríguez Maroño, Carme Pereira Troncoso e Roi Álvarez Castro, na segunda categoría; e Israel Martínez Veiga, Miriam Ferradáns Ferradás e Patricia Torrado Queiruga, na terceira categoría.

Todos estes textos premiados serán publicados nun libro colectivo que verá a luz no vindeiro mes de abril.