O Pico Sacro acolle a lendaria cerimonia celta do lume sagrado

O Pico Sacro foi este domingo escenario da lendaria cerimonia do lume sagrado. O tempo acompañou e o séquito da raíña Alda puxo en escena este ritual celta co que os nosos devanceiros celebraban a chegada do solsticio de verán.

Encabezados pola raíña Alda e polo seu druída, os integrantes da Asociación da Fervenza do Castro de Callobre (A Estrada) concentráronse na contorna do aparcamento do Pico Sacro e comezaron un desfile ata a capela de San Sebastián, acompañados polos músicos do grupo folclórico local Son de Gaita (Sergude).

Unha vez diante da ermida do Pico Sacro, o druída utilizou o seu bastón (cunha lupa no extremo) para concentrar a luz solar na ramaxe que se colocou no pebeteiro. O lume acendeu en só uns minutos grazas á forza do astro rei, creando deste xeito o lume sagrado. As chamas serviron para acender as candeas de numerosos veciños de Boqueixón, que as usarán para acender as cacharelas de San Xoán.

O alcalde de Boqueixón, Ovidio Rodeiro, acompañado polo concelleiro de Turismo, José Luís Mareque, agradeceu a colaboración un ano máis da citada asociación nesta actividade e animou os presentes a coñecer máis polo miúdo o Pico Sacro, participando nas visitas guiadas gratuítas que o Concello ten programadas para este verán. Terán lugar todos os venres, sábados e domingos ata o 14 de setembro ás 12.00, ás 16.00 e ás 18.00 horas. Para participar só é preciso reservar praza chamando ao 981 513 061 ou enviar un email a boqueixonturismo@gmail.com.