Ames conmemora o Día do Orgullo con música, obradoiros e unha Festa Holi

O Concello de Ames presentou este luns a programación organizada a través da concellería de Benestar Social e Igualdade para celebrar o Día Internacional do Orgullo LGBTIQ+, que se conmemora o sábado 28 de xuño. A concelleira de Benestar e Igualdade, Uxía García, e a técnica municipal, Mónica Antelo, foron as encargadas de dar a coñecer o programa das actividades no Paseo da Igualdade, na localidade do Milladoiro.

«Un ano máis no concello de Ames imos celebrar o 28 de xuño, no que se conmemora o Día Internacional LGBTIQ+», sinalou Uxía García.

A concelleira engadiu que «convidamos a toda a veciñanza a que participe nas diferentes actividades que se van celebrar co obxectivo de darlle maior visibilidade ao colectivo LGTBIQ+».

Pola súa banda, a técnica municipal explicou que «as actividades comezarán coa lectura do manifesto institucional e, de seguido, haberá diferentes obradoiros para os nenos e nenas e para os adultos co obxectivo de que poidan participar en familia nestas actividades».

Programa de actividades

O sábado, o concello de Ames encherase de cor a modo de conmemoración. Ás 11.00 horas lerase o manifesto institucional no Paseo da Igualdade, ao cal, como destacou a concelleira, «queremos que lle dea voz unha persoa dalgún colectivo de Ames». A continuación, entregarase o premio ao gañador ou gañadora da segunda edición do concurso fotográfico LGTBIQ+, que se enmarca na campaña Ames a quen ames faino con orgullo e que busca loitar contra a discriminación e promover a igualdade e a diversidade a través da fotografía.

Por outra banda, haberá actividades para todos os públicos: talleres de pintura de bolsas, obradoiros de pintura de pedras e mural, taller de pulseiras e para elaborar espetadas de lambonadas, música, e para rematar, ao redor das 12.30 horas, celebrarase unha Holi Party onde se visibilizarán todas as cores da bandeira LGTBIQ+.