Os oleiros dos anos 40 reviven no Ecomuseo Forno do Forte de Buño

O Concello de Malpica, en colaboración coa Deputación da Coruña, ofrecerá visitas teatralizadas gratuítas ao Ecomuseo Forno do Forte os sábados 12 e 26 de xullo, e os días 9 e 30 de agosto, ás 12.00 horas.

Yago Espasandín e Raquel Crespo, integrantes da compañía Alalá Teatro, serán os encargados de dar vida a unha peza baseada na vida tradicional dos oleiros. A obra narra a reflexión de dous irmáns oleiros dos anos 40, pertencentes á quinta xeración dunha familia dedicada ao barro, que se enfrontan á que cren será a súa última fornada, repasando o seu oficio como forma de vida.

A Deputación aporta 80.000 € para o Forno do Forte de Buño

A representación, titulada Onde nace o fume, é un relato íntimo e poético sobre as raíces, o pasado recente e a evolución dun oficio que marcou a identidade dunha comunidade. A través da dramatización, os visitantes mergúllanse na historia viva do Forno do Forte, accedendo ás vivendas dos oleiros e á exposición do ecomuseo desde unha perspectiva emocional e sensorial.

Un xeito diferente e enriquecedor de coñecer a historia local, sentir a pegada do barro e conectar co espírito dunha tradición que, malia os cambios do tempo, segue viva na memoria colectiva.