O PP de Santa Comba acusa o alcalde de "apropiarse" de obras dos seus predecesores

"Santa Comba está a vivir o mandato municipal máis decepcionante da súa historia. O actual alcalde, Alberto Romar (PSOE) non sabe facer outra cousa que apropiarse das obras proxectadas, deseñadas e ata con financiación conseguidas polos rexedores que o precederon", sinala o PP local.

"Semella que os mellores membros do Goberno de este alcalde que tanto ía facer son David Barbeira e María Pose, na súa alianza con Ucha, que deixaron actuacións deseñadas, aprobadas e con financiación por importe de 2,3 millóns de euros", engaden os populares.

María Pose, que estivo dous anos ó frente do Goberno, deixou para iniciar a ampliación do polígono industrial despois das xestións na Xunta; a renovación de trece paradas de autobús, licitadas pola Xunta en novembro de 2023; a renovación integral do Colexio Barrié de la Maza con numerosas xuntanzas con membros do Goberno autonómico e o compromiso da financiación antes de que os socialistas simplemente presentaran unha pregunta no Parlamento, sen máis méritos; o proxecto do entorno da Casa do Pozo de naturalización de espazos urbanos contra o cambio climático; o obradoiro de emprego Constrúe en verde, deseñado e plantexado no primeiro semestre de 2023; a concentración parcelaria de Freixeiro, proxecto no que traballaron todos os alcaldes da democracia e cuxas últimas xestións fixo María Pose; a nova rede de abastecemento de auga potable desde San Cristóbal; a mellora de viarios e saneamiento en Guisande; a mellora de pavimentación vial entre Cruz de Santos (Ser) e A Ermida (A Baña); a mellora de pavimentación do vial entre Freixeiro Iglesia, A Illa, Castropombo e Portocarreiro; a mellora da pavimentación en Vilar de Abaixo na parroquia da Pereira; a mellora de beirarrúas e instalacións no tramo inicial da avenida do Brasil; e a renovación de saneamento e beirarrúas da avenida de Santiago", explican ao respecto dende o PP de Santa Comba.

Todas estas obras son, segundo aseguran, "herdanza de anteriores gobernos, por moito que Alberto Romar se coloque para a foto". Os populares din que o actual alcalde "tras dous anos, só pode presumir de pechar unha única obra: a mellora da capa de rodaxe no núcleo de Sabaceda e acceso ao cemiterio, que no momento do seu remate xa tiña problemas de pozas e con toda seguridade habería que bacheala en inverno a máis tardar".

Os populares recoñecen que "ten algunha obra máis en marcha", pero que o Goberno local se limita "a aglomerados e capas de rodaxe". "Só hai unha que non afecta aos viais: a do Campo da Feira, que presenta conflitos veciñais, técnicos e ata administrativos e sementa moitas dúbidas sobre a súa viabilidade".

O PP de Santa Comba lembra que o municipio ten 17 parroquias e 135 entidades de poboación, e di que "un 75% das parroquias non son obxecto de ningunha actuación e só 12 das 135 van ver algunha obra, na súa maioría asfaltados ou rebacheos".

A formación lamenta tamén que en xuño de 2024 "o Ministerio de Hacienda interviu o Concello de Santa Comba como un dos máis morosos de España". "A débeda de Alberto Romar a 31 de decembro era de 1.663.215,90 euros e o período de pago a provedores era de 234 días, cando María Pose deixou un déficit de 388,788,41 euros e pagaba en 26 días. E ,a maiores, o interventor levaba dúas décadas en Santa Comba, e agora en dous anos van camiño de catro", engaden.

Finalmente, o PP de Santa Comba anuncia que "pronto" dará a coñecer un estudo moito máis amplo "e cargado de datos, para que os veciños poidan comprobar a quen teñen á fronte do Concello".