A Rapa das Bestas de Sabucedo xa é un Ben de Interese Cultural de Galicia

O Consello da Xunta aprobou este luns o decreto que declara Ben de Interese Cultural (BIC) a Rapa das Bestas de Sabucedo, na Estrada, por acreditar o «seu valor cultural sobranceiro» como patrimonio inmaterial de Galicia, ao tratarse dunha das festas máis antigas de Comunidade con, como mínimo, tres séculos de historia. Esta distinción súmase á de Festa de Interese Turístico Internacional acadada no ano 2007.

A Estrada invita en Braga a coñecer a Rapa das Bestas de Sabucedo a través do Camiño da Geira

A Consellería de Cultura, Lingua e Xuventude culmina así a tramitación iniciada en 2024 para darlle esta distinción a unha celebración «extraordinaria, admirada por propios e foráneos, do noso patrimonio cultural e turístico», que se celebra do 4 ao 7 de xullo na parroquia estradense de Sabucedo.

Desde a Xunta explican que se trata «da manifestación inmaterial máis clara que existe en Galicia da relación ancestral entre uns animais e os seres humanos». Con catro días de duración, a Rapa das Bestas abrangue unha serie de rituais que se agrupan en tres fases: a misa alborada, a baixada dos cabalos salvaxes do monte e a rapa destes no curro.

Ademais, destacan que busca ser un recoñecemento das tradicións e dos costumes do medio rural, «merecentes de se conservaren e seren coñecidos».

O decreto aprobado este luns polo Goberno galego tamén recolle a conveniencia de rexistrar e sistematizar documentos relacionados con este patrimonio para poder ter «unha comprensión máis eficaz e completa».