A Ruada de Val do Dubra medra como referente cultural e rende homenaxe a Chiño, alma da tradición local

A área recreativa de Bembibre converteuse na tarde-noite deste venres nun escenario de emoción, lembranza e festa coa celebración da segunda edición da Ruada Val do Dubra, un encontro coa tradición que busca consolidarse como unha das citas culturais imprescindibles do verán na comarca.

Nesta ocasión, o evento estivo centrado na figura de José Manuel Iglesias, Chiño, mestre, bailador e defensor incansable do patrimonio oral e musical dubrés. Xunto a Carlos Rey, Chiño foi clave na recuperación de documentos sonoros históricos como Derradeira pola vila I ou Ritmos bailables, materiais que serviron de base para a publicación Tocadoras do Val do Dubra. Esta obra, presentada recentemente, recolle non só cancións tradicionais, senón tamén relatos de vida e historias das mulleres que mantiveron viva a música popular na zona.

A xornada arrancou ás 20.00 horas cun acto de homenaxe conducido pola cantareira Felisa Segade. A concelleira de Cultura, Celsa Oreiro, destacou o espírito do evento como “unha defensa dunha cultura, dun idioma e dunha tradición”, puxo en valor a figura de Chiño e reivindicou o papel das persoas que traballan por transmitir as raíces culturais do municipio.

O fotógrafo Eutropio Rodríguez, Chicho, foi o encargado da laudatio, nun emotivo repaso pola traxectoria vital e artística de Chiño, ilustrada con lembranzas e imaxes que gardan o paso do tempo. O ton festivo chegou da man das regueifas de Lupe Blanco e Suso de Xornes, que incluíron composicións propias con referencias ás parroquias de Rial e San Román.

A Asociación Xuvenil Regueifa, promovida por Chiño en 1994, foi quen tomou o relevo escénico, recuperando pezas emblemáticas como a "Muiñeira e xota de Mórdomo" ou a xa clásica "Muiñeira de Bembibre". Como sorpresa, subiu ao escenario Brincadeira, o grupo co que Chiño comezou como bailador con só 19 anos e que dirixiu durante 25 anos. Os seus antigos compañeiros interpretaron a Ruada de Bembibre, unha das composicións máis representativas do repertorio local.

O acto culminou cunha interpretación conxunta de "A Fonsagrada" por parte de Regueifa e Brincadeira, un momento de gran carga emotiva compartido por veciñanza, familiares, músicos e bailadores. Como peche simbólico, a concelleira de Cultura fixo entrega dunha monteira tradicional confeccionada artesanalmente para a ocasión, antes dunha derradeira regueifa e o inicio da noite musical con Os Tres Pesos, Catuxa Salom e A Banda da Balbina, seguida dunha foliada aberta á participación popular.

A Ruada Val do Dubra confirma así a súa intención de se consolidar como espazo de encontro interxeracional arredor da música e o baile tradicional galego, recoñecendo a quen, coma Chiño, dedicaron a vida a manter vivo o legado cultural da terra.