Catorce voluntarios retiran 39 quilos de lixo na praia do Lago de Camariñas

En pouco máis dunha hora de traballo, 14 voluntarios e voluntarias mobilizados pola Asociación Mar de Fábula recollero 39 quilos de lixo mariño na praia do Lago, en Camariñas.

Entre os refugallos recollidos destacan os produtos hixiénico-sanitarios "procedentes do primeiro mal uso do retrete como cubo do lixo e das posteriores descargas das depuradoras que precisan dunha urxente revisión e modernización na súa función", afirma a presidenta de Mar de Fábula, Virginia Barros. Os voluntarios tamén retiraron multitude de anacos de cordas e cabos, tapóns de botellas, bidóns e outros envases.

Debido a súa localización e ao comportamento de correntes e mareas, "este fermoso areal actúa como recolledor dunha pequena parte do lixo que chega ao mar", subliña Barros.

Mar de Fábula quixo adicar esta xornada de limpeza á Doutora Jane Goodall, falecida o pasado 1 de outubro. "Foi unha persoa referente no coidado da natureza até o final da súa vida e déixanos un legado no que apoiarnos para continuar na loita por un mundo mellor", conclúe Virgina Barros.