A Estrada acolle a experiencia INCIBE

O concelleiro de Novas Tecnoloxías, Manuel Magariños, e a concelleira de Cultura, Lucía Seoane, desprazáronse esta mañá á Sala Abanca para coñecer o funcionamento en A Estrada da experiencia itinerante do Instituto Nacional de Ciberseguridade de España (INCIBE), dependente do Ministerio para a Transformación Dixital e de Función Pública.

Durante a xornada, numerosos veciños e estudantes achegáronse ás instalacións para participar nesta iniciativa, que percorre diferentes localidades españolas e permite á cidadanía e ás empresas profundar de maneira lúdica na importancia das boas prácticas en Internet.

Segundo destacaron os responsables, o obxectivo é fomentar a concienciación en materia de ciberseguridade e incrementar os niveis de cultura dixital, de modo que calquera usuario poida desenvolverse con confianza e seguridade na era dixital.