O BNG rexeita as liquidacións da reparcelación de Barraña

O BNG de Boiro solicitará no pleno que se paralice o cobro das liquidacións derivadas do proxecto de reparcelación do Plan Parcial de Barraña.

A portavoz local, Raquel Suárez, pide que se revogue o acordo da Xunta de Goberno do 23 de xuño e se convoquen reunións informativas cos afectados, así como medidas de aprazamento ou fraccionamento dos pagos para evitar cargas inasumibles para a veciñanza.

Dende o BNG din que estanse xirando liquidacións provisionais «que conteñen partidas de gastos asumidos polo Concello de Boiro desde o 2005 ata 2022». Non obstante, engaden, non se recolle «xustificación algunha da necesidade de reclamar os citados gastos neste momento nin da conveniencia de facelo», e sinalan que os elevados importes «impiden aos propietarios asumir os pagos sen endebedarse».