O parque infantil da carballesa Praza do Outeiro contará cun gran carballo de seis metros de alto como peza central

As obras do novo espazo de xogos da Praza do Outeiro están a piques de rematar. O proxecto, enmarcado no programa de Carballo para a infancia, ten como elemento central un gran carballo de seis metros no que os nenos e nenas de catro a catorce anos poderán xogar e que xa está case construído.

A peza, que pode acoller un máximo de vinte cativos ao mesmo tempo, ten unha enorme copa formada por oito poliedros independentes, pero unidos entre si, que albergarán distintos xogos: escalada, reunión, paneis lúdicos, elementos transpasables, trepa... e un tobogán-túnel de 3,75 metros de alto. A árbore, igual que o trolebús do Rego da Balsa, terá iluminación nocturna.

Con esta instalación preténdese dotar á zona dun elemento lúdico con gran capacidade, revalorizar a oferta de equipamento infantil e crear unha peza icónica que realza a identidade do municipio e se complementa cos dous carballos naturais existentes na praza.