“Os Venres na Capela” continúa en Arzúa cunha nova cita de narración oral e música ao vivo

O Departamento de Cultura do Concello de Arzúa continúa este venres coa programación “Outono a escena”, unha proposta que pretende dinamizar as fins de semana dos meses de outubro e novembro con actuacións para todos os públicos.

Nesta segunda cita do ciclo “Os venres na capela”, o público adulto poderá gozar do espectáculo “Vaites, rapariga!”, da compañía Tarabela Creativa, unha comedia negra que fusiona narración oral e música ao vivo.

A peza, protagonizada por Carmen Conde e Su Garrido Pombo, ofrece «historias do nor-oeste», relatos que lembran aos clásicos westerns pero trasladados ao Oeste galego, cun ton humorístico e cheo de retranca. A narración e a música dialogan en perfecta harmonía, creando unha experiencia escénica diferente e chea de forza feminina.

A función terá lugar este venres, 24 de outubro, ás 21.00 horas, na Capela da Madanela, e a entrada será libre e de balde ata completar a capacidade.