‘Medida por medida (La culpa es tuya)’ gaña o Premio do Público do FIOT de Carballo

O espectáculo Medida por medida (La culpa es tuya), de Gabriel Chamé Buendía, gaña o Premio do Público do FIOT, de Carballo, que botou o pano da súa 34ª edición cun balance altamente positivo. Así, o "corazón do teatro en Galicia" contou con preto de 15.000 asistentes ao longo das seis semanas, con 44 espectáculos e máis dunha vintena de actividades paralelas, cunha porcentaxe de ocupación do Programa de Sala dun 100%, "todo un fito nas súas máis de tres décadas de historia", afirman dende a organización.

O referido programa acadou unha puntuación de 4,39 sobre 5, mentres que a nota media da programación global do FIOT (que inclúe o Programa de Sala, o OTNI, a Rúa dos Contos e o FIOT en Ruta) foi dun 4,43 sobre 5, cun total de 2.073 votantes rexistrados.

Medida por medida (La culpa es tuya) foi o espectáculo máis valorado polo público cunha puntuación de 4,75 sobre 5, a moi curta distancia de Yo solo quiero irme a Francia, de Contraproducións, protagonizada, entre outras, por María Galiana, que obtivo a segunda posición cunha puntuación de 4,63 sobre 5.

Alberto Sueiro, presidente da Asociación Telón e Aparte, organizadora do FIOT, destaca "a capacidade de reacción aos problemas e incidencias, grazas a un equipo humano e unha organización do festival solvente e madura. A altísima ocupación dos espectáculos e actividades fan deste último FIOT o máis grande da historia".

Subliña que isto "é grazas a transversabilidade do festival e á súa rede de colaboradoras e colaboradores: públicos, artistas, entidades e colectivos implicados, que conforman un tecido de base, unha raíz única, que de forma horizontal e colaborativa sustenta este gran corazón do teatro en Galicia". O festival volveu ser, engade, un "grande activista, defensor e motor da cultura galega, cada vez con máis adeptos e adeptas que nos visitan e nutren as nosas raíces. Por todo isto, sentimos moitísima gratitude e satisfacción".