A Praza de Galicia da Estrada recuperará a antiga fonte

O alcalde da Estrada, Gonzalo Louzao, anunciou que o Concello está traballando cos equipos técnicos para recuperar a antiga fonte da Praza de Galicia. Unha actuación que se incluirá no proxecto de remodelación e peonalización.

«A comezos do século XX non había farol na Praza de Galicia, pero sí que había unha fonte que naceu nesta praza e que, despois, cando os vehículos comezaron a gañar presenza no espazo público, se moveu para a alameda».

Coa reforma dos xardíns municipais, retirouse e foi gardada, «e agora queremos devolver á fonte a este espazo», afirmou Louzao.

O rexedor sinalou que «forma parte do imaxinario colectivo dos estradenses e naceu aquí, aínda que todos a podemos lembrar na alameda». Aclarou, non obstante, que «non será a mesma que amosan as fotos máis antigas, pois foi modificada décadas atrás».