O PSOE de Muxía acusa o alcalde de mentir en Fitur coa promoción dun evento que nunca se celebrou

O portavoz municipal do PSOE de Muxía, Iago Toba, acusou o alcalde, o popular Javier Sar, de promocionar o ano pasado na feira internacional de turismo Fitur, en Madrid, un evento que nunca chegaría a celebrarse, denominado Percibe Muxía.

Os socialistas critican que este programa "consistía unicamente un folleto sen nada detrás: non existían nin data, nin programa, nin actividades, nin ubicación, nin financiamento, nin acordos co sector percebeiro ou co turístico".

"O suposto evento nunca se chegou a realizar, nunca se deu explicación nin se pediu desculpas por parte do Goberno ao conxunto da veciñanza", indican os socialistas.

Toba dixo que "non é máis que un engano ao sector turístico nacional e internacional, que causa desprestixio ao nome de Muxía, ás suas xentes e ao sector turístico local".

Pola súa banda, en declaracións a este xornal, o alcalde dixo que o evento, que estaba previsto celebrar a través do GALP, "non se puido levar finalmente a cabo por falta de financiamento".

"Tiña un orzamento duns 50.000 euros, e cando o presentamos en Fitur non sabiamos que o Concello ía estar sometido pouco despois a un plan económico-financeiro que nos impediría destinar fondos a ese proxecto", explicou Sar.

Ao respecto, Iago Toba dixo que o Concello perdeu a axuda para ese proxecto "porque non atendeu nin contestou o requirimento de documentación realizado".