Carballo fusiona música e literatura nunha biblioteca co Curruncho Pop

A Biblioteca Rego da Balsa, de Carballo, abrirá o vindeiro sábado 24 de xaneiro o Curruncho Pop, que fusiona música e literatura en base a un programa que foi presentado polo alcalde, Daniel Pérez, e a concelleira de Bibliotecas, Ángeles Pacoret.

A primera xornada, a do sábado 24 ás 20.00 horas, será só musical e estará protagonizada por Fernando Rubio, guitarrista e compositor, que leva editados cinco discos que mesturan música negra, folk e pop psicodélico.

Presentará o seu último traballo, Luzzy, gravado en directo no Festival de Jazz de Cartaxena, e estará acompañado por dous dos Inner Demons: o guitarrista Joaquín Talismán e o percusionista Paco del Cerro.

O sábado 21 de febreiro, ás 19.30 horas, presentarase o libro Caballos salvajes. Gram Parsons (1968-1973), de Jordi Puyol Nadal. Pablo Leira, Ramón Saleta, Joki, Marcos Montoto e Gabrulo acompañarán musicalmente este acto xunto a Ismael Cabaleiro (Malabesta) ao violín e Lucía Pernas interpretando a Emylou Harris, compañeira de Parsons.

Temas de Kriss Kristofferson ou Willie Nelson

O sábado 21 de marzo, ás 19.30 horas, terá lugar a presentación do libro Los forajidos de la música country, de Javier Márquez Sánchez, na que soarán temas de artistas como Kriss Kristofferson, Waylon Jenings e Willie Nelson, coñecidos no seu momento como os outlaws da música country (denominación coa que chegaron a gravar un par de discos), da man da banda Honky Tonk Heroes, creada especialmente para a ocasión por Hendrik Röever, Óscar Avendaño, Ramón Saleta, Joki e Rubén Suárez, cantante e compositor nos The Family Folks.

Un libro dedicado a Bibiano, integrante de Voces Ceibes

O sábado 16 de maio, tamén ás 19.30 horas, a Biblioteca Rego da Balsa acollerá a presentación do libro Bibiano, cambiar para ser un mesmo, de Carlos Rego. Bibiano foi un persoeiro poliédrico dentro da música: foi cantautor e integrante de Voces Ceibes e gravou un primeiro disco producido por Alain Milhaud, o produtor de Los Bravos, entre outros.

Despois de editar tres discos deixou a música como intérprete, pero non se apartou dela, xa que foi o fundador da Escola de Música Contemporánea de Vigo, tivo unha grande promotora de concertos e abriu a mítica sala viguesa Kremlin.

Para tocar as súas cancións estará no Curruncho Pop Alfonso Espiño, acompañado nesta ocasión polo guitarrista Xoán Piñón, que participou na gravación do disco Alcabre e foi fundador do grupo de folk Doa.