O GDR Costa da Morte incentiva proxectos que diversifiquen a economía rural

O Grupo de Desenvolvemento Rural (GDR) Costa da Morte, tras a publicación o pasado 2 de febreiro da nova convocatoria de axudas para as anualidades 2026, 2027 e 2028, organiza tres sesións informativas dirixidas a persoas emprendedoras, empresas, asociacións e entidades públicas interesadas nas axudas do programa Leader Pepac 2023-2027.

As sesións teñen como obxectivo dar a coñecer as características da convocatoria e do procedemento de solicitude das axudas. Celebraranse os días 23 de febreiro no centro sociocultural de Baio (Zas), a casa da cultura da Laracha (día 24) e na casa da cultura de Corcubión (día 25), todas elas de 18.30 a 20.00 horas.

Durante as sesións informarase sobre o funcionamento do programa, os requisitos para acceder ás axudas, os criterios de valoración dos proxectos, os prazos e procedementos de solicitude, así como aclaración de dúbidas sobre posibles iniciativas que poden optar ao financiamento.

O obxectivo destas accións "é achegar o programa Leader ao tecido social e económico do territorio, promovendo proxectos que impulsen a diversificación da economía rural, a mellora da calidade de vida e dos servizos á poboación, a conservación do patrimonio e o emprendemento", subliñan dende o GDR.

A asistencia é aberta e gratuíta. As persoas interesadas poden obter máis información na web www.gdrcostadamorte.com.