Fisterra presenta o cartel dunha Semana Santa de interese turístico

A igrexa de Santa María das Areas acolleu esta mañá o acto oficial de presentación do cartel promocional da Semana Santa de Fisterra, unha celebración declarada de interese turístico.

Ao acto, organizado pola Xunta de Confrarías, sumouse o alcalde, Luis Insua Lago, quen puxo en valor a importancia da Semana Santa como "expresión de fe, tradición e identidade para o pobo de Fisterra", así como o esforzo colectivo que fai posible a súa celebración ano tras ano.

Desde o Concello agradecen o labor da Xunta de Confrarías da Semana Santa e de todas as persoas colaboradoras "que traballan de maneira constante e desinteresada para manter viva unha tradición que é motivo de orgullo para veciños e veciñas". Un paso máis, engaden, "no camiño cara a unhas datas moi sinaladas para Fisterra, recoñecidas polo seu valor espiritual, cultural e turístico".

Novena de Xesús Nazareno

Dende o pasado venres, e ata o día 28 de febreiro, celébrase a novena de Xesús Nazareno ás 19.00 horas no Patronato. E o domingo, día 1 de marzo, celebrarase unha misa cantada ás 12.00 horas na igrexa de Santa María das Áreas.