Concentración en Baíñas: as familias esixen a cobertura da praza de conserxe no colexio

Pais e nais de alumnos do colexio público de Baíñas (Vimianzo) concentráronse diante do centro para reclamar a cobertura inmediata da praza de conserxe.

As familias denuncian que o colexio leva varias semanas sen persoal de conserxería, "o que dificulta o normal funcionamento das instalacións e supón un risco para a seguridade e o correcto desenvolvemento das actividades diarias", afirman.

O conserxe, engaden, "é unha figura imprescindible para a atención ao alumnado, o control dos accesos e o mantemento básico do edificio".

Lectura de manifesto

Durante a concentración, os pais e nais portaron pancartas e leron un manifesto no que instan ao Concello de Vimianzo a cubrir "de maneira urxente a praza vacante, lembrando que se trata dun servizo esencial para o bo funcionamento do centro e para garantir unhas condicións axeitadas tanto para o alumnado como para o profesorado".

Aseguran que manterán as mobilizacións "ata obter unha resposta oficial e unha solución efectiva á situación".