Marcas vandálicas e debuxos alteran a inscrición fundacional del Mosteiro de Carboeiro en Silleda

O Concello de Silleda vén de poñer en coñecemento da Dirección Xeral de Patrimonio Cultural os danos detectados na inscrición fundacional situada na parte exterior da cripta do Mosteiro de San Lourenzo de Carboeiro, un elemento de grande valor histórico e patrimonial integrado no conxunto monumental. Segundo a información trasladada polo persoal que atende o cenobio, os feitos foron advertidos a finais da pasada semana, observándose sobre a superficie pétrea marcas e remarcados realizados con material brando de cor alaranxada, así como debuxos alleos ao ben, que alteran a súa lectura e afectan negativamente á percepción deste elemento epigráfico medieval.

Inspección técnica

Na comunicación remitida á Dirección Xeral de Patrimonio Cultural, o Concello solicita que se xire visita de inspección técnica ao mosteiro co fin de avaliar o alcance dos danos e determinar o protocolo de limpeza, conservación ou restauración máis acaído, de xeito que se poidan eliminar estas marcas sen comprometer nin a integridade do soporte pétreo nin a lexibilidade da inscrición. Na mesma comunicación incorporouse tamén documentación fotográfica dos danos advertidos.

Ao mesmo tempo, dende o Concello de Silleda aproveitouse este escrito para reiterar a necesidade de actuar no muro oeste do claustro, unha zona que continúa valada e con acceso restrinxido.