A Laracha alza a voz: veciños e políticos unidos contra a planta de biogás de Soandres

Ducias de veciños e veciñas da parroquia de Soandres, na Laracha, concentráronse para amosar o seu rexeitamento á implantación dunha planta de biogás no lugar de Vista Alegre. Ao acto de protesta sumáronse representantes do BNG e de Adega.

Os asistentes amosaron as súas inquedanzas e preocupacións polo proxecto, que tamén foi rexeitado, de forma unánime, por todos os grupos da Corporación municipal da Laracha.

Na xuntanza informouse sobre os trámites que están en proceso para a instalación da planta e os efectos medioambientais negativos para a contorna da zona. "A fábrica de biogás sería implantada ao carón do río Anllóns e preto do lugar onde existen vivendas de veciños e veciñas de Soandres", afirman.

Demanda dunha regulación

A portavoz municipal do BNG, Carolina Castiñeiras, alégrase de que toda a Corporación estea de acordo en dicir non á planta, "mais agora agardamos que todos os partidos políticos manteñan a coherencia na súa postura e voten no Parlamento galego o mesmo: a favor dunha regulación que protexa á veciñanza deste tipo de instalacións contaminantes e en contra do espolio da nosa terra por parte de empresas foráneas".