Milleiros de persoas protestan na Laracha contra o proxecto da planta de biogás

Milleiros de persoas participaron este sábado na Laracha nunha manifestación convocada pola Plataforma Stop Biogás A Laracha contra o proxecto de instalación dunha planta de biogás en Soandres. 

Os manifestantes iniciaron a marcha de protesta ao mediodía na Praza Lles Sabres d’Olonne, en dirección á Praza do Concello, e percorreron as rúas baixo lemas como Queremos aire puro, non futuro escuro e numerosas pancartas, incluso un ataúde coa mensaxe Morte de Soandres, escenificando o final do seu modo de vida se a macroplanta de biogás finalmente se fixera realidade.

Ao remate da marcha, diante do edificio do Concello en obras, un portavoz da plataforma convocante leu un manifesto no que deixou claro que “non estamos en contra das renovables, pero si deste modelo” e explicou todos os "perigos e danos" que a planta podería acarrear.

"Isto non remata aquí; é unha loita longa e non imos parar", dixo, xa que, tal como explicou, está o prazo de alegacións aberto ata o 26 de maio e pensan esgotar todas as vías.

Entre os asistentes estaban representantes dos tres partidos da Corporación municipal larachesa (PP, PSOE e BNG), e alcaldes e concelleiros doutros concellos.

Asistiu tamén o deputado autonómico do PSdeG Aitor Bouza, quen subliñou que "este proxecto afecta non só a Laracha, senón tamén aos concellos de Cerceda, Arteixo e Culleredo".

Estes catro concellos presentarán alegacións ao proxecto que está en tramitación, baseadas na protección do patrimonio, a posible afectación aos ríos Anllóns e Valiñas e aos cheiros e molestias que entenden xerará a actividade da planta de biogás.

"É un atentado contra estas terras rústicas, contra este chan rústico", lamentou o Bouza, que se preguntou "pola herdanza que van ter as novas xeracións se finalmente se instala esta infraestrutura". 

"A partir do momento en que unha planta de biogás teña aquí, poña aquí o pé, estas terras caen en picado no seu valor", advertiu o socialista. 

"É un atentado contra o medio ambiente e contra á forma de vida dos veciños da Laracha, que non van ver ningún beneficio con esta nova planta de biogás na súa contorna", engadiu.

Este domingo terá lugar ao mediodía unha charla informativa sobre este proxecto no Casino 1889 de Carballo, na que participarán Laura Barral, bióloga do Centro Interdisciplinar de Química e Bioloxía da Universidade da Coruña; Evaristo Domínguez, do Instituto de Estudos Bergantiñáns; e Vanessa Abeleira, enxeñeira civil.