Os Miñatos gañan a Olimpíada Cultural do IES Fernando Blanco de Cee

O IES Fernando Blanco de Cee celebrou a XV Olimpíada cultural "O saber ten premio", un dos sinais de identidade do instituto, que comezou a súa andadura baixo a dirección de Chelo Trillo Lago.

A competición comezou cunha primeira fase de preguntas na plataforma da aula virtual sobre contidos que se desenvolven en materias e módulos que se imparten no centro. Tres equipos competiron na gran final: Os miñatos, Os sapiños pintos e Os tres colas, que se someteron a unha nova rolda de preguntas en directo nun salón de actos ateigado de alumnos, profesores e familiares.

Os miñatos e Os tres colas clasificáronse para o gran debate: A sociedade actual favorece os hábitos saudables? Tras unha longa deliberación do xurado, o equipo dos Miñatos alzouse co primeiro premio.

Empresas patrocinadoras

Á gran final sumáronse os representantes das empresas patrocinadoras: Xeal, Gerca e Ferretería Roget, acompañados do equipo directivo do centro e do director territorial de Educación, Santiago Freire.

Dende o centro educativo amosan o seu agradecemento ás empresas patrocinadoras, a todos os equipos participantes, ás preparadoras do debate, ao formador Juan Santamaría, profesor especialista en debates, ao presentador Fran Hermida, ao xurado e á comisión organizadora do acto.