Un castro animado: Borneiro viaxa ao pasado con recreacións históricas

O Concello de Cabana de Bergantiños programou para o sábado 11 de xullo, unha nova edición do Castro Animado, que devolverá a vida ao recinto castrexo da Cidá de Borneiro.

Os asistentes mergullaranse na forma de vida dos antigos poboadores dos castros a través dunha variedade de propostas lúdicas. Entre elas figuran un encontro e interacción cos habitantes doutros castros, así como unha recreación na croa do castro que permitirá reconstruír escenas da vida cotiá deste asentamento.

A gastronomía terá un papel destacado, cunha degustación de produtos cabaneses acompañados de bebidas castrexas. Ademais, o público poderá gozar de mostras de artesanía e cerámica, xogos populares a cargo de Miudiño e unha recreación histórica da man do Clan de Breogán.

Actuacións musicais

A música asumirá tamén un protagonismo especial ao longo da xornada, coas actuacións dos Farrapos, As Lerchas, As Cantareiras de Anos, Son de Cabana e Felipe Mourelle. A xornada completarase coa animación de Cé Orquestra Pantasma e a actuación de A Vela Circo.

Con esta programación, a cita combinará historia, cultura e lecer nun enclave patrimonial de referencia, como é o castro da Cidá de Borneiro. Dende o Concello de Cabana animan á veciñanza a participar "nunha proposta que pon en valor un dos xacementos emblemáticos do municipio e a gozar dunha tarde de convivencia veciñal arredor da cultura castrexa".