Ana Pontón presentará este mércores a candidatura de Escarlata Pampín á Alcaldía de Ames

A portavoz nacional do Bloque Nacionalista Galego, Ana Pontón, asistirá este mércores 15 ao acto de presentación da candidatura de Escarlata Pampín López á Alcaldía de Ames por esa formación para as vindeiras eleccións municipais.

O acto celebrarase ao mediodía no Pazo da Peregrina de Bertamiráns.

Escarlata Pampín naceu en Santiago de Compostela en 1982. Casada e con dous fillos, reside en Ventosa, na parroquia amesá de Covas. Licenciada en Xeoloxía pola Universidade de Oviedo, formouse posteriormente en Prevención de Riscos Laborais, cun Máster Técnico Superior en Prevención de Riscos Laborais, Especialidade Ergonomía e Psicosociología Aplicada.

Seguiu a súa formación coas especialidades de Seguridade no Traballo en PRL e de Hixiene Industrial en PRL. Traballou como xeóloga, sendo directora técnica das áreas de XTL e XTC, e compatibilizando o seu traballo coa súa actividade como monitora de patinaxe en diferentes escolas deportivas municipais.

É concelleira da Corporación municipal de Ames dende 2019. Durante o mandato 2019-2023 formou parte do Goberno municipal e xestionou as áreas de Normalización Lingüística e Mocidade.

Dende abril de 2024 é a portavoz municipal do BNG. Nas eleccións municipais de 2027 será candidata á Alcaldía por primeira vez.