Arzúa Viva volve con xogos, obradoiros e actividades para todos os públicos

A Carballeira de Santa María, situada detrás do pavillón polideportivo de O Cruceiro, acollerá este domingo, 26 de xullo, a décimo novena edición do programa Arzúa Viva, con actividades de lecer e actuacións para público infantil e a mocidade.

De 17.00 a 21.00 horas haberá inchables, obradoiros, xogos tradicionais de madeira e outras moitas actividades recreativas, como un fotomatón e un touro mecánico. Ademais, a partir das seis da tarde terá lugar un espectáculo de monicreques. Como remate celebrarase a Festa da Escuma.

Arzúa Viva é unha iniciativa do Departamento de Cultura do Concello de Arzúa, e a asistencia a todas as actividades é totalmente de balde e de acceso libre.

O concelleiro de Cultura, José Luís García, anima a todas as familias "a participar nesta xornada pensada para o desfrute de todas e de todos con actividades que buscan o entretemento e pasalo ben, mais tamén a convivencia entre veciñas e veciños nun ambiente festivo e de lecer".