O novo Punto de Atención á Infancia de Laxe abrirá en setembro con 11 nenos xa admitidos

O Concello de Laxe dá un paso definitivo para a posta en marcha do seu novo Punto de Atención á Infancia (PAI). O alcalde, Francisco Charlín, asinou a resolución de adxudicación do contrato da empresa que se fará cargo da xestión do servizo, que comezará a funcionar no mes de setembro.

Trátase dun novo servizo que o goberno municipal conseguiu poñer en marcha, unha vez acondicionado e preparado o local no que se desenvolverá a actividade.

O PAI iniciará a súa andaina cunha importante resposta por parte das familias: 11 nenos e nenas xa foron admitidos, tal e como se fixo público a través da páxina web do Concello de Laxe.

Proposta máis vantaxosa

A xestión do servizo foi adxudicada á empresa Senes Cit S.L., ao presentar a proposta considerada máis vantaxosa para o Concello, tanto desde o punto de vista económico como pola súa proposta educativa e organizativa.

O alcalde destaca que a adxudicación permite "combinar dous obxectivos fundamentais: garantir a profesionalidade e a calidade do PAI e, ao mesmo tempo, facer unha utilización responsable e eficiente dos recursos públicos".

“Conseguimos unha empresa profesional para prestar un servizo que consideramos fundamental para as familias e fixémolo coa oferta máis vantaxosa. Aforrar non significa reducir a calidade: significa xestionar ben, porque os recursos que non é necesario gastar aquí poderán empregarse noutras melloras e servizos para Laxe", subliña Francisco Charlín.

Resposta con traballo e xestión

A posta en funcionamento do PAI "constitúe tamén unha resposta con feitos ás críticas e protestas que acompañaron o proceso durante os últimos meses. Mentres algúns se dedican á crítica permanente, nós preferimos responder con traballo, xestión e resultados", engade o rexedor.

Destaca especialmente "a rapidez" coa que se desenvolveu todo o procedemento unha vez preparado o espazo. "Había un compromiso coas familias e estamos cumpríndoo. O mellor xeito de demostrar o bo facer dun goberno é que os proxectos deixen de ser promesas e se convertan en realidades".

A creación do PAI supón un novo avance nos servizos municipais de conciliación e atención á infancia, "facilitando ás familias de Laxe a compatibilidade da vida laboral e familiar e ampliando os recursos públicos dispoñibles no municipio", conclúe Charlín.