Máis de 1.500 espectadores gozaron dos espectáculos de Á EsCEEna! en Cee

Á EsCEEna! 2026 consolida a Cee como capital do teatro en Galicia durante o mes de agosto. Máis de 1.500 espectadores foron testemuñas de primeira man do éxito de cada unha das seis propostas que se puideron ver na vila da Xunqueira.

A maioría dos espectadores, chegados desde diferentes puntos da Costa da Morte, apostaron por retirar o abono para todas as funcións. A Semana do Teatro e das Artes Escénicas acolleu este ano os espectáculos das compañías Teatro do Noroeste, Verdeveras, Malasombra, La Griot´te e Noite Bohemia.

Sen pausa, a actividade cultural en Cee continúa esta semana con programación na rúa, na praza da Constitución, coa nova edición de Cultura no Camiño. A programación arranca hoxe, ás 20.00 horas, con Bandullo Azul, que presenta Miro e a Música das Cousas (A banda sonora dunha vida).

Mañá, martes día 25, A Xanela do Maxín presentará Lúa quere viaxar a... Marte!; o mércores 26 será a quenda de Música Miúda con Cambia o conto; o xoves 27, Dende Arriba deleitará aos asistentes cun espectáculo de acrobacia; e o venres 28 Especialistas Hípica Celta presentará Mystic Fire.

Danza de Galicia e Canarias

O Verán Cultural rematará o sábado 29 co II Intercambio Cultural de Danza Galicia-Gran Canaria, que terá lugar ás 20.00 horas no Auditorio Baldomero Cores. Organizado pola asociación cultural Novo Viana contará tamén coa participación do grupo A.F. Abenechara de Valleseco (Gran Canaria).

Ademais, ata finais de mes segue aberta ao público a exposición Entre as flores, de Mónica Coto.