Re-Inventándonos: Vimianzo abre un camiño de apoio a mulleres en situación de dificultade

O Concello de Vimianzo puxo en marcha o programa Re-Inventándonos, unha iniciativa dirixida a mulleres que se atopan en diferentes situacións de dificultade persoal, social ou laboral e que busca acompañalas na recuperación e fortalecemento dos seus proxectos vitais.

A iniciativa parte dunha idea fundamental: cada muller ten unha realidade, unhas necesidades e uns obxectivos diferentes, polo que ofrece un itinerario de acompañamento personalizado, adaptado ás circunstancias e intereses de cada participante dende a perspectiva de xénero.

Ao longo do programa traballaranse diferentes ámbitos que poden contribuír á mellora da súa situación e á construción de novas oportunidades, entre eles o desenvolvemento persoal, o benestar emocional, a autonomía, a orientación social e laboral, a formación e a definición de obxectivos persoais e profesionais.

Compartir experiencias

Ademais do acompañamento individual, o programa contará con actividades e espazos de traballo grupal que permitirán compartir experiencias, adquirir novas ferramentas e favorecer a creación de redes de apoio.

"Re-Inventándonos é, así, un espazo para facer balance, descubrir capacidades, establecer novos obxectivos e contar con acompañamento profesional durante o proceso", subliña a concelleira de Benestar Social, María José Pose.

Financiado pola Xunta e a Unión Europea

O programa está financiado pola Consellería de Política Social e Igualdade e cofinanciado pola Unión Europea a través do Fondo Social Europeo Plus (FSE+), no marco das actuacións destinadas á promoción da igualdade e ao apoio a mulleres en situación de especial vulnerabilidade.

A iniciativa desenvolverase no Concello de Vimianzo durante os vindeiros meses, ofrecendo ás participantes un espazo de acompañamento e orientación adaptado ás súas necesidades dende a mirada de xénero.