Xosé Regueira e Miguelanxo Prado, Premios Bos e Xenerosos de Honra do Festiletras

O Festiletras, do Couto, en Ponteceso, distinguiu este ano cos Premios Bos e Xenerosos de Honra ao vicepresidente da Deputación da Coruña, Xosé Regueira, e ao ilustrador Miguelanxo Prado. Unha distinción coa que o festival quere poñer en valor o seu labor a prol da lingua, da cultura e da identidade galegas.

Nos actos participaron o alcalde, José Manuel Mato, e o presidente da Fundación Eduardo Pondal, Xosé María Varela.

Dende o Festiletras destacan que Xosé Regueira representa unha forma de entender a defensa de Galicia baseada na participación, na implicación coa comunidade e no apoio constante ás iniciativas culturais que nacen desde o territorio.

Unha relación estreita

Ao longo dos anos, Xosé Regueira mantivo unha relación estreita co Festiletras e coa aldea do Couto, acompañando o festival nas súas diferentes etapas e compartindo ideas, tempo e afectos. Unha presenza continuada que, para a organización, transcende o apoio institucional e se converte nun vínculo persoal cunha celebración que reivindica a literatura, a música, a lingua e a cultura galegas desde o rural.

"Hai persoas que fan país desde a palabra, o compromiso e a xenerosidade cotiá. Xosé Regueira é unha delas", sinalaron os organizadores do Festiletras.

O apoio da Deputación da Coruña

Xosé Regueira agradeceu o recoñecemento "con humildade", recollendo o galardón "non só en nome propio, senón no da administración que realmente leva apoiando durante todos estes anos o Festiletras: a Deputación da Coruña".

"Sempre considerei este evento como un pequeno gran milagre e sempre crin nel e agora, coa carga que depositan sobre min, tamén como unha enorme responsabilidade", sinalou o vicepresidente provincial. "Para calquera pequena aldea do país é moito máis fácil montar un palco, traer unha orquestra ou un trío e facer unha verbena, que converter as súas eiras e camiños nunha referencia nacional de celebración das nosas letras, da nosa cultura, da nosa lingua e da nosa identidade".