Ames inaugura setembro coas Brincadeiras Miúdas do programa Apego

Ames celebrará o próximo mércores 2 de setembro as Brincadeiras Miúdas, cunha xornada de música, baile, xogos tradicionais e creación de xoguetes na Carballeira dos Trasnos dende as 18.00 horas. A iniciativa parte do programa Apego do Concello, que ofrece actividades de balde para o público familiar sen necesidade de inscrición previa.

O programa Apego presentará unha variada programación durante os próximos meses, incluíndo actividades como xogos, contos, obradoiros, música, cinema, teatro e maxia; todo isto co obxectivo de favorecer a transmisión da lingua e, ao mesmo tempo, fomentar unha educación en galego positiva e creativa.

As Brincadeiras Miúdas inaugurarán un programa pensado para todos os públicos, cunha tarde de actividades a cargo de Cé Orquestra Pantasma, un músico e mestre xogueteiro especializado en animación infantil, que achega á cativada á natureza con diferentes propostas lúdicas e musicais.

O programa Apego é un proxecto de dinamización da lingua dirixido a nenos e nenas de entre 0 e 6 anos, que achega recursos e unha ampla proposta de actividades lúdicas e educativas. As persoas interesadas en sumarse a esta iniciativa poden facelo poñéndose en contacto co Servizo de Normalización Lingüística do Concello de Ames.