A Baña recupera o Servizo de Normalización Lingüística

O Concello de A Baña recupera o Servizo de Normalización Lingüística, que comeza unha nova etapa como servizo comarcal compartido co Concello de Negreira. Esta iniciativa ten como principal obxectivo impulsar a lingua galega nos diferentes ámbitos da vida municipal, coa intención de contribuír ao aumento do prestixio social do galego como lingua.

Este servizo tamén pretende retomar o programa Apego, orientado á promoción do uso do galego desde a infancia, xunto co proxecto Maimiños e Furabolos. A programación incluirá, ademais, o Club de Debate Alingua, unha iniciativa que ten como obxectivo fomentar o uso oral do galego entre a mocidade, mellorando á vez a capacidade argumentativa e o pensamento crítico.

Outro dos obxectivos da iniciativa centrarase no acollemento lingüístico, mediante a organización de cursos e grupos de conversa en lingua galega destinados a facilitar a aprendizaxe, a práctica e o uso cotián do idioma.

Dende o Concello consideran que este servizo é unha ferramenta importante para desenvolver novas accións de dinamización da lingua galega, especialmente durante as primeiras etapas da vida. O Goberno municipal dará a coñecer durante as vindeiras semanas os detalles dos diferentes programas e actividades do Servizo de Normalización Lingüística.