Ames pon o galego ao alcance de todos con novos obradoiros de acollemento lingüístico

Ames abrirá mañá as inscricións para os obradoiros de acollemento lingüístico "En galego, co teu acento". Ditas inscricións permanecerán abertas ata o vindeiro venres 11 de setembro. A iniciativa busca aproximar a veciñanza amesá á lingua e á cultura galegas dun xeito práctico. Todo isto á vez que se busca favorecer a integración social das persoas procedentes de fóra de Galicia.

Celebraranse dous obradoiros, un en Bertamiráns e outro no Milladoiro, de case un mes de duración. As sesións impartiranse en horario de mañá de luns a xoves e terán dúas horas de duración. A inscrición nestas actividades é gratuíta e pode realizarse tanto de xeito telefónico como de xeito presencial: acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo do Milladoiro.

O obradoiro

O obxectivo da iniciativa “En galego, co teu acento!” é o de achegar a lingua e a cultura galegas á veciñanza procedente de fóra de Galicia ou que, por diferentes motivos, non tivo oportunidade de coñecela. Neste obradoiro colaboran a Concellería de Normalización Lingüística e Benestar Social e terá unha duración total de 30 horas. A primeira quenda será a de Bertamiráns, que se desenvolverá do 15 de setembro ao 8 de outubro no Pazo da Peregrina, de 9.30 a 11.30 horas. A quenda do Milladoiro comezará o 13 de outubro e rematará o 5 de novembro. Terá lugar no Centro Multifuncional durante o mesmo horario que as sesións de Bertamiráns.

As persoas que asistan a un mínimo do 90% das sesións serán obsequiadas cun diploma acreditativo de asistencia.