Lista de agarda no comedor do CEIP Bergantiños, en Carballo

Un nutrido grupo de pais e nais de alumnos do CEIP Bergantiños, de Carballo, participaron este martes nunha concentración de protesta ante o centro educativo para volver reclamar o incremento das prazas no comedor escolar para o curso 2026/2027. O acto foi convocado pola ANPA A Granxa.

As familias decidiron mobilizarse «ante a situación xerada pola denegación de prazas no comedor escolar para o vindeiro curso», explica Rocío Villar Díaz, a presidenta da ANPA, quen indica que actualmente ofértanse só 150 prazas para un centro que conta con 546 alumnos.

«Neste momento hai máis de corenta nenos e nenas en lista de agarda, e decenas de familias afecatdas porque nin sequera puideron presentar a solicitude, debido á aplicación estrita da norma de áreas de influencia», sinala.

Varias das familias afectadas teñen como centro de referencia por domicilio o CEIP A Cristina, «un centro que non dispón dos servizos de comedor nin Madruga, polo que carecen de unha alternativa real para poder conciliar».

A queixa dos pais e nais do CEIP Bergantiños xa foi admitida a trámite pola Valedora do Pobo.

Mentres , as familias reclaman un aumento urxente de prazas á Consellería de Educación e ao Concello de Carballo.

Resposta da Consellería de Educación

Pola súa banda, a Consellería sinala que "o comedor ten 150 prazas concedidas e xa é preciso organizalas en dúas quendas". Destaca ademais que "non recibimos solicitude de ampliación de prazas por parte do centro este verán".

Por outra banda, lembra que "o comedor escolar é un servizo complementario, ao que a Xunta contribúe cun investimento de máis de 67 M€ ao ano, entre a xestión directa e indirecta do servizo e as diferentes liñas de axudas a concellos, ANPAS, entidades de atención á diversidade e familias. Isto permite a prestación do servizo a máis de 78.000 alumnos".

"A maiores, e para o caso dos comedores que non son xestionados pola Xunta, ofrecemos un novo apoio de 150 € para as familias", engade a Consellería de Educación.