Ancestros: sons de carácter celta con influencias nórdicas e fusión

A finais de 2019 naceu en Ancestros, unha agrupación musical de carácter celta, con influxo nórdico e fusións étnicas e tradicionais. O grupo ten a súa orixe en Lantaño, parroquia ubicada no Concello de Portas, e realiza versións e composicións orixinais en galego, xunto con elaboradas representacións escénicas adaptadas á temática. Conta con trece membros, entre eles cantantes, violinistas, gaiteiros, guitarristas e percusionistas, ademais dos bailaríns Yara e Kevin Juncal.

Ancestros organiza os seus espectáculos en catro fragmentos: o primeiro interpreta os valores da sociedade galega en torno á súa riqueza histórica e cultural; o segundo fragmento inspírase no Camiño de Santiago, a peregrinación e a literatura galega; o terceiro destaca o misticismo, as crenzas e os rituais históricos cunha importante representación escénica, e o último fragmento fundaméntase nos refraneiros populares e as cantigas.

Entre o seu repertorio atópanse obras como O camiño, Patria, Afouteza, Espíritu das fragas, Nana dos soños, Miña Terriña e Tesón, unhas cancións inspiradas na pandemia causada polo coronavirus. Ademais, conta con tres instrumentais: un de violín, outro de gaita basado nunha muiñeira, e un último de despedida.

Os músicos que compoñen Ancestros contan cunha ampla experiencia a súas costas, tanto no que atinxe ao sector como en diferentes agrupacións líricas.