Santiago
+15° C
Actualizado
jueves, 18 agosto 2022
22:36
h
Andainas. Trescentas cincuenta persoas sumáronse ao roteiro solidario por Malpica para colaborar na loita contra o cancro // Alumnos da UNED percorreron Ponteceso e a comarca bergantiñá // Dende
A Laracha viaxaron ata o municipio de Zas para gozar dos encantos da ruta da auga TEXTO Manuel Lavandeira

Camiñando pola Costa da Morte

Ducias de persoas calzaron as botas esta fin de semana para camiñar pola Costa da Morte con diferentes fins: solidarios, lúdicos e formativos.

Así, na Laracha comezou o programa Andainas na Primavera, que organiza o Concello. A primeira saída, á que se sumaron corenta e unha persoas, foi para percorrer a Ruta da Auga, polo municipio de Zas.

A inscrición continúa aberta para a Ruta Sendeiro Laxe-Traba (8 de maio) e a Ruta Caión-Baldaio (día 22 de maio). Está limitada a persoas empadroadas no termo municipal da Laracha, é gratuíta e debe formalizarse no concello.

Pola súa banda, o Concello de Malpica, xunto coa Asociación Española contra o Cancro, organizaron este domingo a andaina solidaria En marcha contra o cancro, que reuniu a 350 persoas, das que vinte foron nenos e nenas.

O Concello tamén doou duascentas chapas artesáns realizadas polo oleiro Antonio Pereira O Rulo. Uns accesorios, elaborados en barro e nos que o lazo verde distintivo está pintado a man. Serán vendidos a 10 euros pola asociación, que recadará integramente o importe das ventas que realice.

Una achega que agradeceu Carmen Teresa Blanco, presidenta da agrupación local da Asociación de Loita contra o Cancro, ao tempo que destacou “a implicación e compromiso” amosado pola veciñanza e polo Concello, que estivo representado polo alcalde, Eduardo Parga, as concelleiras Noeila Freijeiro e Marisol Blanco, así como dos voluntarios de Protección Civil e todas as persoas que colaboraron para que todo saíra ben, especialmente á técnica de Deportes, María Bardanca. “Sen todos eles non sería posible a realización de esta andaina”, afirmou.

Unha colaboración que quixo agradecer entregando o diploma outorgado pola Asociación Española contra o Cancro ao colectivo en recoñemento aos 20 anos de traballo. A presidenta da entidade tamén destacou que coa venda de camisetas, chaquetas e bolsas recadaron 600 euros. Unha contía que, xunto coa das inscricións e a da venta das chapas, irá destinada ás actividades da asociación e á investigación.

Os participantes percorreron unha ruta de cinco quilómetros que partiu da Fonte de Villar Amigo e discorreu por San Antonio, Castelo, Seixas, Ardeleiro e Lapachán antes de rematar no punto de partida. A actividade foi presentada pola xornalista malpicán Selina Otero.

E en Ponteceso recibiron a visita de 51 alumnos e alumnas da UNED da Coruña, que recalaron nalgúns dos enclaves máis destacados do municipio a través dunha ruta histórica patrimonial e cultural pola comarca de Bergantiños.

Unha actividade que permitiu aos participantes coñecer os elementos singulares de Ponteceso, como as igrexas de Cores e Mens cuxos segredos e detalles foron dados a coñecer por Luís Giadás Alvárez, profesor de Historia no IES Eduardo Pondal. Posteriormente fixeron a ruta do mar de Corme ata a Praia de Balarés, guiados polo técnico de Turismo, Javier Couto. Visitaron tamén o cabo Roncudo e o dolmen de Dombate, onde foron recibidos polo xeólogo Juan Ramón Vidal Romaní.

26 abr 2022 / 01:00
  • Ver comentarios
Noticia marcada para leer más tarde en Tu Correo Gallego
TEMAS
Tema marcado como favorito
Selecciona los que más te interesen y verás todas las noticias relacionadas con ellos en Mi Correo Gallego.