Carballo e Laracha levan a Cervo o seu modelo de reciclaxe do lixo orgánico

Os concellos de Carballo e A Laracha exerceron como modelo na implantación do contedor marrón para a recollida de orgánicos na Semana Europea da Prevención de Residuos que se celebra en Cervo. Ata a mariña lucense desprazáronse os tenentes de alcalde da Laracha, José Ramón Martínez, e de Carballo, Lois Lamas, para expoñer as experiencias prácticas dos dous municipios, que foron pioneiros en Galicia na implantación destes novos colectores.

Martínez Barbeito detallou as accións informativas e divulgativas levadas a cabo polo Concello larachés desde meses antes da posta en marcha do servizo en febreiro de 2020, o bo uso por parte da cidadanía dos colectores marróns, que se reflicte na baixa porcentaxe de impropios que se depositan neles (un 5 % segundo a última caracterización realizada por Sogama), e os beneficios que está a significar nos aspectos medioambiental e económico pola máis eficiente xestión dos residuos.

A xornada concluíu cunha visita guiada ás obras da planta de biorresiduos que se está a construír en Cervo.