Corenta empresas colaboran na inserción de estudantes de Cee
O 45 % dos alumnos do IES Fernando Blanco foron contratados ao rematar as prácticas // Dende este centro din que o obxectivo é coidar o sector produtivo
Un total de corenta empresas de Costa da Morte acolleron este ano aos cincuenta e dous alumnos e alumnas do IES Fernando Blanco, de Cee, para a realización das formación en centros de traballo. Corenta e seis deles fixérono na modalidade ordinaria e seis na dual en segundo ano. Unha colaboración que permitiu que o 45 % dese alumnando fose contratado polas referidas empresas.
A directora do instituto, Consuelo Trillo, e o coordinador dos programas de Formación en Centros de Traballo, José Pardiñas, queren amosar o agradecemento do centro ás empresas e “poñer en valor a súa xenerosidade”.
Aseguran que os bos resultados obtidos son o froito do “traballo dos nove titores e titoras do cento, a boa acollida das empresas e o saber facer do alumnado”. Lembran que a inserción laboral “é un dos obxectivos da colaboración entre centros educativos e tecido empresarial, e sinalan que “a nosa formación e a colaboración destas empresas contribúen a coidar o sector produtivo da Costa da Morte”.
Subliñar ademais que nestes plans formativos colaboran empresas de todo o tipo. Este ano, o alumnado do IES Fernando Blanco foi acollido por entidades bancarias, xestorías, asesorías, aseguradoras, o Rexistro da Propiedade, metalúrxicas, talleres de automóbiles, compañías de ascensores, instaladores eléctricos e electrónicos, e empresas de montaxes mecánicos, de frío, construción, conserveiras e de servizos de augas. Tamén colaboraron os concellos da comarca e o Hospital Virxe da Xunqueira.
AMPLA OFERTA. O IES Fernando Blanco acolle unha ampla oferta formativa, e a partir deste venres, día 25, abre o prazo de admisión, que se prolongará ata o luns 5 de xullo ás 13.00 horas para o réxime ordinario e o 2 de xullo no caso do réxime Dual.
A oferta formativa inclúe os ciclos de grao superior de Administración e Finanzas, Automatización e Robótica Industrial (réxime Dual) e os ciclos de grao medio de Instalacións Eléctricas e Automáticas, Electromecánica de Vehículos Automóbiles, Xestión Administrativa e Mantemento Electromecánico.
Todas as solicitudes faranse online, polo que se poderán facer desde a casa e despois presentar a documentación que se requira no instituto. Na páxina web do centro teñen a información de acceso, pero os interesados poden chamar tamén ao número de teléfono 881 880 467 para recibir toda a información relacionada co acceso aos distintos ciclos formativos.
PREMIOS. Os departamentos de Electricidade e Electrónica e de Instalación e Mantemento foron premiados polos seus proxectos presentados á convocatoria de Innovación na FP. O primeiro desenvolveu un programa de Técnicas de intelixencia artificial para a resolución de problemas, e o segundo un Sistema de diagnose mediante parametrización de sensores en máquina de peche. Contaron coa colaboración de varias empresas.
··· A adaptación da oferta formativa ás demandas actuais é clave para favorecer a inserción laboral dos alumnos. Por iso, os centros da Costa da Morte están a incorporar novos ciclos no seus plans de estudos. É o caso do IES Maximino Romero de Lema, de Baio (Zas), que o vindeiro curso impartirá o ciclo de grao superior Desenvolvemento de Aplicacións Web en réxime dual, que complementará o ciclo de grao medio Sistemas Microinformáticos e Redes. Ademais, impartense a ESO, Bacharelato e FP Básica de Informática de Oficina.
··· O Centro de Promoción Rural EFA Fonteboa, de Coristanco, tamén ampliará a súa oferta coa implantación do ciclo de grao superior de Transporte e Loxística, que foi presentado ao tecido empresarial da comarca de Bergantiños nun acto celebrado no Centro de Promoción Económica do Polígono de Carballo. Ademais de dar a coñecer os contidos e o programa de prácticas, o encontro servíu tamén para coñecer as necesidades das empresas neste sector e o perfil de traballadores que buscan.