Cruces acada investimentos
que pasan do millón de euros
O goberno local saca adiante nas súas negociacións proxectos como unha senda peonil ou a renovación do centro urbano
O alcalde de Vila de Cruces, Luís Taboada, amosou a súa satisfacción polo resultado das reunións coa Deputación e a Xunta de Galicia e que permitirán ao goberno local sacar adiante investimentos para a vila pontevedresa por valor de 1.074.612 euros.
O primeiro investimento é unha actuación moi solicitada e que garante unha maior seguridade para a veciñanza, ao conseguir dotar dun camiño peonil seguro ao instituto, ao centro de saúde e ao tanatorio cunha senda de ancho variable, pero cun mínimo de 2,5 metros na súa marxe dereita, facéndoo coincidir co IES Marco do Camballón.
Crearase así “un camiño escolar seguro” para o alumnado deste centro educativo, pero tamén servirá para dar maior seguridade aos accesos de dotacións próximas e moi utilizadas pola cidadanía.
O proxecto terá un custo de 182.033 €, dos que a Deputación achegará o 80 % e o consistorio o 20 % restante.
Este investimento veu acompañado doutro moi importante que pasou os filtros dos técnicos da Deputación. Taboada confirmou que se vai realizar este proxecto de 892.360 euros para a mellora da rúa Vázquez entre os entroncamentos da rúa Sergio Iglesias Pazos e da travesía Vázquez 2. Do total do investimento, 596.681 € serán financiados pola Deputación Provincial de Pontevedra.
A todo isto, tamén engaden os traballos que se están realizando de acondicionamento do vial do polígono industrial de O Camballón, con outro investimento adxudicado cun valor de 98.219,98 euros, e que estiveron revisando o alcalde, Luís Taboada, e o tenente de alcalde, Julio López, os cales confirmaron que os traballos van a bo ritmo e que fan o recinto empresarial máis accesible e seguro.