En O Son preservan o legado mariñeiro e blindan o seu futuro
Porto do Son Mariñeiro é un escaparate virtual orientado á posta en valor do patrimonio material e inmaterial da confraría de pescadores sonense, co que dá a coñecer o seu arquivo de fondos históricos documentais dixitalizados. Este venres foi presentado en sociedade, nun acto que contou coa participación da conselleira do Mar, Rosa Quintana; a directora xeral de Desenvolvemento Pesqueiro, Susana Rodríguez; o alcalde Luis Oujo e representantes da citada entidade mariñeira, entre eles o patrón maior e o secretario, Emilio Queiruga e Jesús Longueira, respectivamente.
A titular de Mar enxalzou o intenso traballo realizado polo pósito durante máis de dous anos para organizar, inventariar, catalogar e dixitalizar os seus fondos, poñendo a disposición do público xeral máis de 1.600 expedientes recollidos en 39.000 imaxes que permiten entender e coñecer a evolución da entidade e da propia vila sonense.
Rosa Quintana tamén subliñou que o resultado obtido “é froito da forte implicación social desta localidade na protección e conservación do seu legado e patrimonio mariñeiros para que poidan chegar intactos ás futuras xeracións”.
Así, esta iniciativa, desenvolvida no marco do Proxecto de recuperación e posta en valor dos fondos documentais da confraría baixo o paraugas do Grupo de Acción Local do Sector Pesqueiro (GALP) ría de Muros e Noia Costa Sostible, permitirá a transmisión dese legado de xeración en xeración e que tanto Porto do Son como Galicia avancen na protección do seu pasado, presente e futuro mariñeiros.
A conselleira eloxiou ademais o labor da confraría sonense pois concorda coa estratexia deseñada pola Xunta para protexer o seu legado mariñeiro mediante a elaboración do Plan da cultura marítima de Galicia-Horizonte 2030. Este documento, que se elaborará no marco dun convenio de colaboración asinado a comezos de mes entre a Consellería do Mar, a Universidade da Coruña e a súa fundación, permitirá deseñar accións para preservar o patrimonio e a cultura marítima da Comunidade e blindar o seu futuro.
historia A Confraría San Telmo de Porto do Son é un símbolo identificador da vila e da comarca, unha sinal de identidade dunha institución pesqueira que soubo superar os avatares do paso do tempo, adaptándose ás vicisitudes de cada época e trazando o rumbo da política pesqueira local. Desde 1923, cando se formalizou, o arquivo foi xerando a documentación que hoxe permite coñecer as orixes e a súa evolución.
Conselleira do Mar
“Trátase dun patrimonio vencellado co mar que explica a transformación do territorio e do modo de vida da xente do mar, da súa construción social e cultural ao longo do tempo e da evolución dos seus oficios e técnicas en todo o litoral galego”, destacou Rosa Quintana durante a súa intervención. Un proxecto, engadiu a titular de Mar, “que contribúe a difundir o amplo patrimonio e cultura marítima de Porto do Son e Galicia”. O investimento necesario para a execución do proxecto rolda os 90.000 euros e contou co apoio do Goberno autonómico e do Fondo Europeo Marítimo e de Pesca (FEMP) no marco da convocatoria de 2020 de axudas aos grupos de acción local do sector pesqueiro.
a ENTIDADE MARIÑEIRA sonense soubo adaptarse ás circunstancias recorrendo ás novas tecnoloxías e ás novas canles de comunicación para protexer a súa cultura marítimo-pesqueira e facela accesible a calquera persoa do mundo. A súa creación remóntase ó ano 1923 cando ao abeiro da Real Orde do 5 de xaneiro de 1919 se crea o pósito, co obxectivo de solucionar os problemas pesqueiros do momento. O seu primeiro patrón foi José Abeijón Vidal. En 1945 transfórmase na actual Confraría de Pescadores San Telmo e desde ese momento xogará un papel importante no desenvolvemento da vila. Entre os documentos máis destacados está o primeiro libro de actas. Sen dúbida, unha iniciativa que permite realizar unha viaxe ao pasado de O Son evitando a perda de fondos de gran valor histórico.