Forte reforzo do equipamento dos GES na área compostelá
A Xunta reforzará o equipamento de emerxencias dos Grupos de Emerxencias Supramunicipais (GES) coa entrega a 13 grupos neste ano de distintos vehículos (6 furgonetas 4x4 e 5 camións Bomba Rural Pesada) para mellorar a eficacia nas súas intervencións, así como catro equipos de excarceración e outro material diverso para a atención de emerxencias. No caso de dous deles (o grupo con sede en Curtis e o servizo municipal de Terras de Celanova) contarán cun novo vehículo e un equipo de excarceración.
O investimento neste equipamento ascende a máis de dous millóns de euros, no marco dos máis de vinte e catro millóns destinados pola Xunta de Galicia nos últimos anos ao reforzo do equipamento destes grupos e dos servizos de Protección Civil dos municipios, pese a tratarse dunha competencia local.
O GES de O Sar e Caldas (con sede en Padrón) recibirá cadansúa furgoneta de servizos varios 4x4 coas que acceder a todo tipo de zonas e cunha cisterna de 450 litros de auga. A Xunta investirá 655.759 euros en 6 vehículos deste tipo (109.203 euros en cada unha delas).
Aínda que non forman parte dos concellos da área compostelá, hai que indicar que ademais, do destinado a Padrón, cederanse outros vehículos na área de Ferrol aos GES de Ferrol-Eume e de Ortegal e Ferrol, con sedes en Mugardos e Ortigueira respectivamente, e ao de Friol-Palas de Rei na provincia de Lugo, mentres que na provincia ourensá recibirán cadansúa furgoneta os GES A Veiga-Viana e o que atende á zona Viana-Verín, con sede na Gudiña.
A Xunta tamén fará entrega neste 2023 de 5 camións tipo Bomba Rural Pesada (BRP) cun custo total de máis de 1,2 millóns de euros. Os destinatarios destes vehículos serán o GES que dá cobertura á zona de Bergantiños, con sede en Ponteceso, e o que atende á área de Betanzos-Terras de Melide-Ordes, con sede en Curtis. Estes vehículos contan con tracción integral 4x4 e cunha cisterna de auga cunha capacidade de 3.500 litros, para intervir na extinción dos lumes, contribuíndo así a reducir a afectación na zona. Ademais, permiten o acceso a todo tipo de lugares, desde terreos urbanos a estradas secundarias en áreas rurais e pistas forestais ou camiños.
Tamén se dotará ao GES Betanzos-Terras de Melide-Ordes dun equipo de excarceración.
O vicepresidente segundo e conselleiro de Vicepresidencia, Xustiza e Deportes, Diego Calvo, indicou a este xornal que “as novas entregas de 6 furgonetas de servizos varios, 5 camións Bomba Rural Pesada (BRP) e 4 equipos de excarceración por máis de 2 millóns de euros amosan o compromiso da Xunta cos servizos de emerxencias dos concellos”.
Sinalou asemade que celebran “a decisión das Deputacións da Coruña e Lugo de renovar a finais do ano pasado os convenios sobre o funcionamento dos GES coas melloras da Xunta e aplicalas nos quince grupos destas dúas provincias”.
“Demostran que as nosas medidas para mellorar a cobertura das emerxencias na comunidade que xa se veñen aplicando nos 12 GES de Ourense desde o ano pasado, eran as correctas. No caso dos GES da provincia de Pontevedra rexeitaran as medidas e o acordo actual vence a finais deste 2023”, apuntou Calvo.
Vicepresidente segundo e conselleiro de Vicepresidencia, Xustiza e Deportes
“Pese a tratarse dunha competencia municipal, no caso das localidades de máis de 20.000 habitantes, e das deputacións provinciais, nas de menor poboación, vimos realizando un importante esforzo con máis de 24 millóns de euros nos últimos anos só en equipamento dos GES e dos servizos de Protección Civil”, indicou Diego Calvo.
“No caso dos GES asumimos tamén máis da metade do seu custo de funcionamento anual, ao igual que facemos cos consorcios provinciais de bombeiros. Para contribuír a unha Galicia máis segura, desde a Xunta colaboramos para dispor de servizos de emerxencias ben equipados e formados a través dos centos de cursos impartidos na Academia Galega de Seguridade Pública”, engadiu. Calvo dixo que “tentamos facilitar o gran traballo destes grupos mantendo o noso compromiso con este colectivo”.
Dende logo que en Galicia é vital dotar aos Grupos de Emerxencias Supramunicipais do mellor material para facilitar as súas intervencións. E con isto refírome especialmente aos incendios forestais que cada verán tinguen de negro os montes da nosa comunidade. O feito de que o Goberno galego se preocupe por dotar aos GES de distintas áreas da comarca compostelá de vehículos con cisterna de auga de alta capacidade é fundamental para anticiparse a futuros desastres. Para acabar con eles son necesarios bos profesionais, pero tamén bos equipos que non entorpezan o seu labor. É por iso que nunca está de máis un reforzo neste senso, pois desgrazadamente, á hora de declararlle a guerra ao lume toda axuda é pouca.