Moita ilusión e soños na visita de Papá Noel aos concellos da Costa da Morte
Percorreu as rúas de Camariñas, Ponteceso, Vimianzo e Cee para tomar boa nota de todos os desexos dos nenos e nenas destas comarcas atlánticas
Vimianzo. A visita de Papá Noel á Costa da Morte espertou unha gran ilusión entre os nenos e nenas destas comarcas atlánticas. Tomou nota dos seus desexos para facer realidade os seus soños.
En Camariñas organizaron unha cabalgata única, que percorreu todas as rúas do municipio, e en Vimianzo recibiu aos máis pequenos no auditorio da casa de cultura, ademais de visitar os colexios San Vicenzo e Baíñas, a escola infantil Os Vimianziños e a residencia xeriátrica.
Tamén se achegou ao municipio de Ponteceso, onde decenas de nenos e nenas de todo o concello fixeron realidade o seu soño de coñecer a Papá Noel. Percorreu as parroquias en coche eléctrico.
Ademais, houbo recepción na biblioteca municipal, onde os pequenos lle manifestaron os seus desexos ademais de contarlle como lles foi o ano e entregarlle as súas cartas coas peticións de agasallos.
Durante o seu percorrido polas terras de Pondal, Papá Noel estivo acompañado polos membros de Protección Civil e tamén das concelleiras Noelia Varela e Maite Chouciño, que obsequiaron a todos os nenos e nenas participantes cun agasallo.
En Cee, Papá Noel percorreu todo o municipio no día de Noiteboa e pola tarde compartiu unha gran festa cos nenos na Praza 8 de marzo. M. L.