O alcalde de Teo rompe o bipartito ante os desacordos e falta de confianza

O alcalde de Teo (A Coruña), Rafa Sisto (Son de Teo), retirou este luns as competencias municipais aos seus socios de goberno do PSOE (Uxía Lemus da Iglesia, Roberto Moñino Gil, Mayte Argibay Silva e José Manuel Elías Noya) e queda só xunto a outros tres concelleiros no goberno municipal.

“Comuniqueilles aos concelleiros socialistas o cesamento nas súas responsabilidades de goberno. Foi esta unha decisión difícil, pero inevitable, que viña xestando desde hai varios meses e que fomos atrasando coa esperanza de poder reconducir a situación”, explica o alcalde nun comunicado publicado na web do seu partido.

Na páxina do Concello de Teo pódese consultar a organización realizada: Iria Otero Cepeda será concelleira delegada de Infraestruturas, Administración, Lingua e Mocidade; Xosé Ignacio Iglesias Villar, queda como concelleiro delegado de Benestar, Persoal, Deportes, Participación Veciñal e Servizos Básicos, e María López Álvarez é a concelleira delegada de Educación, Cultura, Igualdade, Movilidad, Comercio, Turismo e Emprego. O resto das áreas son asumidas directamente pola alcaldía.

Neste comunicado web de Son de Teo, Rafa Sisto sinala que para “poder afrontar un goberno serio e con garantías, precísase lealdade e coherencia”. “Lealdade aos pactos que se acordan e lealdade cos compañeiros de camiño”, explicou. Ademais, fixo fincapé na coherencia de goberno como un concepto ausente dentro do partido socialista do municipio.

FALLO EN TEMAS IMPORTANTES. Segundo apunta o edil, esta cuestión “fallou” en temas “tan importantes” como a xestión compartida dos fondos europeos, o mantemento dunha residencia teatral ou artística e no “respecto” aos compromisos adquiridos polo goberno local na pasada lexislatura e que xa contaban con retencións de crédito para levalos adiante.

Rafa Sisto apunta, así mesmo, que “a coherencia non está enfrontada coa diversidade”, pero advertiu de que os concelleiros “actúan por delegación da alcaldía”. “Poden ter autonomía e capacidade de decisión nas súas áreas, claro que si, pero a alcaldía que as nomea ten que estar informada minimamente do que se fai, entre outras cousas, porque é a responsable última”, agrega.

Neste sentido, o rexidor de Teo afirma que as reunións de goberno foron “desde o primeiro momento monólogos” en que a parte de Son de Teo “expoñía os proxectos e informaba do feito, mentres que a parte socialista calaba”. Tras reivindicar que a súa formación sempre tivo “vontade de sumar”, como así o testemuñan seis anos de goberno en coalición, Rafa Sisto recoñece a “dificultade” da situación, por quedar en minoría. O edil, sinala no comunicado deste luns que para chegar a esta decisión, “deuse unha situación que se veu xestando desde fai tempo e que intentamos correxir pero que terminou precipitando este desenlace”. Ademais, fixo fincapé no abandono do goberno por parte dos seus socios.

“O que determina que se rompa este goberno é que eu non podo ser o alcalde de todos, son un alcalde dunha gobernanza colaborativa de distintas forzas políticas, con autonomía na xestión e con capacidade de inicitiativa propia”. Pero denunciou o corportamento dos seus exsocios socialistas ao recalcar que “os concelleiros e concelleiras actúan por necesidade propia, é dicir, dentro da súa autonomía, responden económicamente de todo o que fan, para iso o mínimo que ten que saber e coñecer o alcalde é “que é o que fan”, insistiu.

Ao fío, denunciou que nesta lexislatura produciuse “unha degradación que non se viran en lexislaturas previas”.” Na actualidade”, agrega, “que as diferencias existentes deixaban entreverse, xa que, en cada reunión municipal, existía unha parte que non intervía nin aportaba as tarefas que realizaban nas súas áres asginadas”.

Con todo, e segundo estableceu, buscan continuar a gobernanza cun reparto temporal das áreas. Ante o que o edil confía en establecer novos pactos e apoios con outras formacións.

“Abrimos pois con responsabilidade un período transitorio que debese levar á conformación de novos pactos que dean maior estabilidade ao goberno. Sabemos da nosa capacidade de diálogo e de acordo e non dubidamos de que, dunha ou outra forma, garantiremos apoios maioritarios que permitan executar os retos que temos que afrontar”, sentenciou.

Ademais dos catro concelleiros logrados por Son de Teo e os outros catro do PSOE, a Corporación municipal está conformada por sete edís do PP e dous do BNG, esta última sendo a formación política de ámbito máis próximo ao actual goberno, no que confía os próximos apoios, segundo fontes próximas.