Valga recordará sempre o vistoso final do festival Confluencias
Difícil será de olvidar o remate do festival Confluencias en Valga para un público que encheu o auditorio para desfrutar, e moito, da calidade artística da Banda Municipal de Valga, a voz de Uxía Senlle e a gaita de Susana Seivane, que puxeron o broche a esta cita que se celebrou durante toda a fin de semana coa organización da Escola de Música e Musival, coa colaboración do Concello e da Xunta, a través do Agadic.
Dúas das grandes figuras da escena musical galega acompañaron á Banda de Valga na xornada de clausura do festival. A agrupación dirixida por Manuel Villar Touceda foi a encargada de abrir os concertos do domingo, seguida de Uxía, unha das renovadoras da música tradicional galega con máis de 30 anos de carreira artística ás súas costas.
O colofón chegou con Susana Seivane, unha das gaiteiras galegas con maior recoñecemento nacional e internacional, que presentou unha compilación de todos os seus traballos cun son moderno e actual.
Durante toda a fin de semana nove artistas e agrupacións pasaron polo escenario do Auditorio nesta primeira edición de Confluencias.
A Orquestra Clásica de Valga, o Ensamble CSM Galicia e El Barullo inauguraron o festival o venres, mentres que o sábado tomaron o relevo a solista galego-suíza Nastasia Zürcher, a banda de jazz Alfonso Calvo Septet e Abe Rábade Trío.