Limítanse a 6 as xuntanzas de non convivintes no interior e a 10 no exterior

Cre Núñez Feijóo que o Goberno cometeu un triple erro nas súas estimacións a respecto de cando se acadaría a inmunidade de rebaño, da porcentaxe de poboación necesaria para conseguila, e nas súas estimacións sobre a vacinación da poboación. Cre que, ao ritmo actual, a poboación máis nova non estará vacinada mesmo ata o mes de novembro.

Núñez Feijóo atribúe á poboación flotante a situación epidemiolóxica de Sanxenxo, que define de "risco extremo".

O presidente da Xunta confirma, a preguntas dos xornalistas, que malia a actual situación epidemiolóxica non se van pechar os concellos perimetralmente. A continuación mostramos unha gráfica dos aforos permitidos.

Quedan prohibidas as reunións de non convivintes de máis de 6 persoas no interior, e de máis de 10 no exterior ou de máis de dous unidades familiares. 

Ademais, quedan prohibidas as reunións de non convivintes entre a 1 e as 6 da madrugada nos concellos con nivel alto de restricións, e entre as 3 e as 6 da madrugada nos municipios en nivel medio ou medio baixo.

As medidas entrarán en vigor o vindeiro sábado, se ben deberán ser ratificadas polo Tribunal Superior de Xustiza de Galicia.

Confirma Núñez Feijóo que naqueles concellos con niveis de restricións máximo e alto, pecharanse os locais de ocio nocturno. 

Para evitar o peche de locais de hostalaría, nos concellos que esteán en nivel alto ou máximo requerirase para entrar nos locais unha das seguintes cousas: o certificado de vacinación completa, unha proba negativa de COVID nas últimas 72 horas, ou acreditar ter pasado a infección. Quedan exentos os menores de 12 anos. O aforo nos municipios en nivel máximo será do 30% no interior e 50% no exterior. 

Nos municipios en nivel medio non fará falta ningún documento para entrar nos locais de hostalaría. O aforo será do 50% no interior e do 50% no exterior.

No nivel baixo tampouco será preciso ningún documento para acceder ao interior dos locais de hostalaría. Os aforos quedan no 50% no interior e no 100% nas terrazas.

Neste intres hai sete concellos galegos en nivel máximo de restricións: O Barco de Valdeorras, Cambados, A Pobra, Boiro, Meaño, Sanxenxo e O Grove, nos que viven 80.000 galegos.

En nivel alto quedan 29 concellos: Ourense, Avión, Barbadás, O Carballiño, Porto do Son, Carballo, Fisterra, Oleiros, Vimianzo, Arzúa, Ribeira, Melide, Burela, Viveiro, Cervo, Foz, Ribadeo, A Illa, Vilagarcía, Vilanova, Marín, Poio, Pontevedra, Vigo, Baiona, Gondomar, Nigrán, O Rosal e Tomiño.

Alberto Núñez Feijóo recoñece "un problema importante" de abastecemento de vacinas. Reclama máis doses e lamenta que se tivera que frear o proceso de vacinación.

O presidente confirma que a vacinación dos menores de 29 anos comezará na semana do 26 de xullo ao 1 de agosto.

Insiste o presidente en que as vacinas están a resultar efectivas, protexendo á poboación de máis idade de máis contaxios e falecementos. 1,6 millóns de galegos dispoñen xa da pauta completa. Galicia é a segunda comunidade autónoma con máis poboación inmunizada, en concreto o 65,6% dos galegos.

Lamenta o presidente que só estean a acudir aos cribados o 40% das persoas citadas, o que nos leva a estar nun risco certo de incremento de contaxios.

Di Núñez Feijóo que non se pode baixar a guardia por varios motivos: porque as persoas mozas tamén sofren "as consecuencias dramáticas" do COVID, porque "poden estender os contaxios aos grupos de xente xa vacinada", e de feito, en dúas semanas triplicouse e mesmo cuadriplicouse a porcentaxe de persoas contaxiadas malia ter a pauta completa. Outra das razóns é o aumento da presión hospitalaria: do 11 ao 17 de xullo se duplicou o número de persoas na UCI, e triplicouse o número de persoas hospitalizadas en planta. De manterse as cifras actuais, en 15 días superaríanse os 400 pacientes hospitalizados, e 100 nas unidades de coidados intensivos. A taxa de positividade aproxímase ao 10%. 

Explica o presidente que no grupo de idade de 12 a 30 anos a incidencia é de 1.000 casos por 100.000 habitantes, fronte a incidencia de 50 no grupo de 70 a 79 anos e de 36 nos maiores de 80 anos. 

O presidente da Xunta admite que maila a que esta ola de COVID en Galicia é diferente ás anteriores porque afecta sobre todo a menores de 40 anos, e consecuentemente tamén é moi diferente a ocupación nos hospitais, a situación é preocupante. A taxa de positividade en Galicia é do 9,4%, e a incidencia acumulada a 7 días é de 300 casos por cada 100.000 habitantes, moi preto dos 327 casos da media nacional, e de 466 casos a 14 días fronte aos 622 a nivel estatal.