Dios Ke Te Crew está de volta co seu sinxelo ‘Déjà Vu’

Déjà Vu, así se titula o novo sinxelo de Dios Ke Te Crew, unha das bandas máis emblemáticas do hip hop galego. Un tema que se poderá escoitar a partir do 13 de decembro nas principais plataformas dixitais.

Este lanzamento –que será publicado co selo Raso Estudio e distribuido pola compañía Altafonte– marca o despegue dunha nova etapa da mítica formación de Ordes –conformada por Mou, Sokram, Jamas e Dj Murdock– coa que amplía o seu repertorio para ofrecer, de cara ao 2025, unha intensa e potente xira coa que percorrerán ducias de escenarios.

Déjà Vu trátase do primeiro tema que Dios Ke Te Crew lanza tras o EP En que ano estamos? (2022) e o álbum recompilatorio Tremendos Anos 20 (2023), o disco-fanzine publicado fai agora un ano con motivo da celebración das dúas décadas de traxectoria desta banda de Ordes. O sinxelo virá acompañado dun videoclip que contará coa sinatura do realizador Xaime Miranda.