A cultura galega vive un "crecemento moderado"

“2024 foi un ano de crecemento moderado para a cultura galega”. Esta é a conclusión á que chega o Barómetro da cultura galega 2024, o cal foi presentado este martes en Santiago de Compostela, na sede do Consello da Cultura Galega, pola presidenta desta institución que elabora este estudo desde o ano 2021, Rosario Álvarez, e o responsable do barómetro, Håkan Casares.

O estudo, que recolleu datos de 976 empresas, profesionais, departamentos de cultura das administracións públicas e entidades culturais do terceiro sector entre o 20 de xaneiro e o 28 de febreiro de 2025, destaca que o 39% das entidades enquisadas “tiveron un 2024 mellor que o ano anterior”, mentres que o 21% asegura que “lle foi peor”.

Estudo por sectores

O barómetro establece que entre as entidades que tiveron un “ano positivo” atópanse os museos, aquelas organizacións que desenvolven actividades relacionadas co patrimonio cultural, a educación cultural, os departamentos de cultura das administracións; e, con algo de distancia, as artes gráficas, as bibliotecas e arquivos, a música e o audiovisual. Tamén na parte positiva se sitúan o teatro, a danza, os espectáculos e as actividades auxiliares das artes escénicas. Pola contra, no plano negativo, están as artes visuais e o comercio de libros.