Gala i Ovidio desvela un novo sinxelo do seu segundo traballo discográfico

Tras o lanzamento do seu primeiro EP, Un final, Gala i Ovidio, o proxecto musical no que se atopan inmersos a ribeirense Aida Tarrío e o barcelonés Raül Refree, desvela No puedo, un novo sinxelo que formará parte do segundo traballo discográfico deste dúo musical, o cal se espera ver completado a principios do vindeiro mes de maio.

Así, Gala i Ovidio achega unha canción íntima e profunda que xa se pode escoitar nas diferentes plataformas dixitais e mostra, segundo os artistas, "unha nova cara compositiva".

Sen elementos rítmicos, espida e tremorosa, esta peza, anuncia o grupo, "narra a imposibilidade de materializar un desexo palpitante". Ademais, por primeira vez na curta traxectoria da banda, o piano de cola toma o protagonismo sobre a electrónica para "acompañar á voz profunda dunha forma moi emocionante na paixón non consumada".

No puedo acaba cunha preciosa sección instrumental onde se oen unha risa de lonxe e o son dun proxector de cinema, porque, como sinalan os membros de Gala i Ovidio, "mesmo nos momentos máis complicados podemos lembrar os momentos felices da nosa memoria".