O taekwondo galego suma dos ouros e un bronce en Bulgaria
Iván García, Tania Castiñeira e Alma Pérez sobresaen no podio na proba Open de Sofía
“Magnífica foi a actuación do taekwondo galego no Open de Sofía (G2)”, dese xeito fala a federación galega desa proba que se celebrou hai días en Bulgaria. Iván García (+87, Mat´s) e Alma Pérez (-53, Suh Sport) acadaron a medalla de ouro, mentres que Tania Castiñeira (+73, Hebe) logrou o bronce.
Ademais, hai que destacar que Pablo Patiño (-68, patiño) e Arlet Ortiz (-57, Mat´s) quedaron á beira das medallas, ao caer nos cuartos de final. Alma Pérez (-53, Suh Sport) fixo cinco combates para acadar o título.
No primeiro combate enfrontouse a unha descoñecida Elif Stoyanov (Austria), á que superou con claridade (0-17). A continuación esperaba a romanesa Liana Musteata, “unha competidora cun gran curriculum” (subcampioa de Europa e reserva no preolímpico europeo), pero outra vez Alma estivo a un gran nivel na pista e venceu por 3-1.
Nos cuartos de final, a galega venceu a Daniela Souza (México) por 3-7, e así logrou a clasificación para as semifinais. Na semi enfrontouse a Laura Rodríguez, de Castela a Mancha, que é a súa rival directa en España e foi unha loita moi axustada que rematou con empate (3-3) e que se decidiu no punto de ouro a favor da nosa deportista.
A final foi contra outra mexicana Fabiola Villegas e volveron ofrecer un combate axustado que se decidiu, igual que a semifinal, no punto de ouro a favor de Alma.
Iván García logrou o ouro no peso pesado, no que se notou a ausencia dos deportistas rusos, de forma que só participaron 8 deportistas e Iván fixo tres combates para acadar a primeira posición.
Nos cuartos desta cita internacional en Sofía, superou a Partik Divokovic (Eslovenia), “un vello coñecido de Iván, co que xa competira antes e incluso adestrara.
O competidor galego foi moi superior nun cómodo combate (18-7). Na semifinal gañou ao serbio Mitar Maklenovic e na final esperaba o actual subcampión olímpico Dejan Georgieski (Macedonia) e Iván acadou o éxito (12-7) e con este novo Open e os 20 puntos sumados, xa colocouse entre os 16 primeiros do ranking olímpico.
··· O bronce foi para Tania Castiñeira que superou o primeiro combate contra a serbia Tepavac (2-1). En semifinais, enfrontouse a cabeza de serie número 1, a polaca Kowalczuk e a galega tratou de ser moi ofensiva para contrarrestar á polaca, pero non puido puntuar e caeu por 2-0. Pola súa banda, Arlet Ortiz (-57) gañou o primeiro combate a Amina Hammich (Noruega) con claridade (1-10) e no segundo superou a Nadja Tesic (Serbia) por 1-11. Nos cuartos de final caeu ante a canadense Skylar Park, número 4 do top mundial e que foi a que se proclamou campioa do Open de Sofía. Tamén caeu nos cuartos Pablo Patiño (-68) logo de superar dúas eliminatorias: gañou ao alemán Mohamed Omeirat no punto de ouro, despois do empate no combate (11-11) e ao bosnio Sadmir Habibovic (3-7). Nos cuartos non puido superar a Javi Pérez.