Falece Carlos García Martínez, director do Museo do Pobo Galego

Fondo pesar na cultura galega pola morte do compostelán Carlos García Martínez, que faleceu este sábado en Santiago.Nado na capital galega en 1945, o historiador e dinamizador cultural fíxose cargo da dirección do Museo do Pobo Galego trala morte de Antón Fraguas en 1999. Nesta entidade xa fora previamente mentor e fundador, asumindo despois labores de secretario e de subdirector. Segundo informa Efe, a capela ardente quedará instalada o domingo a partir das 16 horas no Museo do Pobo Galego. O enterro terá lugar o luns (17 h.) na parroquia de Figueiras.

Entre outras institucións, tamén foi membro do Instituto de Estudos Galegos Padre Sarmiento, académico correspondente da Real Academia Galega e integrante da comisión xestora do novo Seminario de Estudos Galegos. En 2008 recibiu o galardón de Galego de Decembro que outorga o Grupo Correo Gallego.